Kunnõ Rijk

Setonius/ Kangilaski Otti ainil

 Väegä vanal aol oll säitsme maa ni vii takah Kunnõ Rijk`. Näil olnu sääl egälde kõrd majah.

   Kõgõ korgõmpa olliva sääl ülikunnaq, kiä sõs ummi siäst juhtkunnaq valeva. Tuu nakaski sõs rijki valitsõma. Noil olliva ummakõrda hulk tentsikit ni tuapoissa kedä eräkunnaq kutsuti.Riigi egäl jaol olliva umaq kihelkunnaq ni valdkunnaq. Amõtkunnaq olliva nuuq kõgõ riigitruimbaq. Korgõmpidõl istiva kaala pääl korgrõhkkunnaq, madalimpide kaala pääl jälq matalrõhkkunnaq.

  Tüüliskunnaq tennü muudku tüüd. Maakunnaq aivaq põllumajandusõ asjo. Vesi- ni jõgikunna juhativaq laivanduist ni kalamajanduist. Mõtskunnaq ellivä mõtsah, puie otsah. Vahtkunnaq tüütivä savodan, koh vahtkumme tetti. Kärnkunnaq olliva jälq ravvavabriguh kõvaq kärnitegijäq. Õhkkunnaq olliva kaivandustõh, a lassiva vaihtõpääl muido suurõmpit kivve vasta taivast. Leeväküdsäjäq olliva leibkunnaq. Suurõmpiteh söögitarõdõh olliva pääkokis padakunnaq. Tarbijaskunna kulutiva kõik toodõdu kraami arõq, aq elänikkunnaq kaiva es kui arq elläq. Et rahvast vähämpäst jääsiq, tuu jaost olliva sugukunnaq, höste vällä sorditu miis- ni naiskunnaq.

   Harimise iist saisiva hüä koolkunnaq ni tiädüskunnaq. Praasnikka kõrraldamise iist saisiva hüä ringkunnaq, kost väegä hoolõga võtiva osa seltskunnaq. Aolehti anniva vällä lehekunnaq. Apteeken segäsivä ruuht rohokunnaq. Pillimängo ni lauluanniga kunnaq anniva kõgõ kunnakontserte. Sõaväkke võetuid kutsuti aigkunnaq. Riigi piire perrä kaivaq piirkunnaq, kinkal olliva väegä hüä nägemisega kunnasilmäq. Piirkunna maakaitsõväe pääligust oll nämbält jaolt mõni kilpkunn.

   Rotta sõa aigu kunnõga, häösi Kunnõ Rijk` ar. Kunnaq laosiva tõistõ eläjide ni inemeste sekkä lak´ja. Näide järeltulijidõst ommava tulnu inimkunna esiesäq. 

Tagasi Setoniusõ mano