Kui Eimidägi valmis tsäpändäti

Setonius

Tuu oll vereväl aol. Vinnemaalt, Novosibirskest and teedäq üts suur tsibitsäpändämise(kvantmehhaanika),  asatundja Ivvan, Ivvani poig Ivanov, et timäl om lännü kõrda tetäq valmist Kõkõ Suurõmp Eimidägi (Absoluutne Eimiski). Tuu tähendäs, et sääl toheiq ollaq üttegi tsibiputinat (elementaarosakest).

Tuu kuulutusõ pääle tull kokko asatundjit egäst Ilma veerest, et tuud imeht uma silmägä kaiaq. Tull filmimiihhi, tull kirätsurasid ni  muido päävävargit. Ivanov vei nimäq üte sara mano, tekk väretiq vallalõ ni pallõl kõik sisse astu. Keset sarra sais jalgu pääl üts korgõ, höörik, tsigunist annum, minkal olliva ümbretsõõri väikukõsõq tsõõriguq aknakõsõq.

Ivanov tekk päähhä õndsa näo ni ütel: “ Siih seeh omgi tuu Kõkõ Suurõmp Eimidägi. Kõik võivaq kaia ni uma silmägä tunnstada, et sääl seeh olõiq mitte ku midäge.“

Küläliseq kõik astiva liki, kaivaq ni ahhetivaq. Mõni kai peris mito kõrda.

Kõrraga näist üts hõigas: „Tõemeeli, sääl seeh olõiq midäge, no sääl seeh om KIÄKI!!

Läts Ivanov uma aparaadi mano, kai ni heitü arq. Sääl, kos midäge tohes ollaq, oll KIÄKI. Pühkse sõs ummi silmäklaasõ, võtt süäme rõndu ni küsse: „Kiä saq säntene sääl olõdõ?“ Kõik olliq hillä nigu kooluhavvah...Sõs kostu, nigu mitte peris aparaadi seest, aq kostkilt ülevältpuult  nii, et terve sara kumisi: „JUMMAL!!“

Peräh vereväq leheq kirotivaq, et tuu oll õigõ. Ku inenene häöt kõik perämite otsani arq, sõs tsäpänd tä valmist midäge säänest, midä olõiq kuna olõman olnu.

Tagasi Setoniusõ mano